للأسف شفنا يوم الخميس يوم ارجعت منا للتداول وافتتحت 1960 وبعدين تلاها صفقة بالحد الادنى فخفق المؤشر السعري -40 نقطة نزول مرة وحدة حيث كان المؤشر -40 وفجأة صار -80 فيتضح من هذه الحركة كم هو اثر منا على المؤشر .
هذا اذا علمنا ان آخر اربع ايام تداول كان هناك تصريف واضح على السهم وذلك من ارتفاع كمية التداول في آخر اربع ايام كما ان الشمعات المتكونة كلها شمعات تصريفية واكثرها وضوحا الشمعة الاخيرة.
كما انه دائما التصريف يتم قبل الهدف المعلن للحصول على الشراي واليكم الامثلة :
المخازن ايام ما كانت 5 دنانير قالوا رايحة عشر دنانير وما بقى واحد بالكويت الا شرى المخازن حتى البنقالي اللي يجيب شاي بالسوق يمكن خذاله شوي وأين تم التصريف ؟؟
تم ب 6760 والعالم حيل يشترون وكل ما نزل قالوا لا بكرة بيرتد عندهم عقد عندهم مادري شنوا والى يومنا هذا وشوف عينكم السهم يتداول بحدود الدينار وهي من هي من الشركات الكبرى ذات الأصول الضخمة ولكن هذا الحاصل.
سهم اللبنانية واللي ما يعرفونه من مستجدين البورصة هو سهم المستثمرون حاليا لمن وصل 1120 قالوا لا أحد يبيع لا يخضونكم السهم رايح 1360 وما عليكم يومين ويرد ونزل ونزل ونزل والمساكين متعلقين بالأمل !!!
سهم المجنونة الدولية صعد من 170 فلس ل 1180 وقالوا حزتها السهم بيطير رايح على اقل تقدير 1800 اذا مو دينارين وشوف عينكم السهم قاعد ينشات بالفناقر يوميا ب 300 .
سهم بترو جلف شلع من 350 الى الدينار بصحبة الأسطورة الحفار وقالو ان الحفار ببيعونه بأكثر من راس مال الشركة وأرباح خيالية وبعدين قالوا هونا نبي نأجر الحفار وبعدين قالوا وقعنا مذكرة تفاهم مع ايران وبعدين قالوا حصلنا مستأجر بسعر أفضل وشوف عينكم السهم انقط عقبها الى كم ؟؟ كم تتخيلون ؟؟ الى 244 فلس حد أدنى من الدينار .
وسهم الرابطة والوطنية العقارية وسلطان والمعادن وشوفوهم اليوم مو مترقعين والناس متعلقة فيهم بأسعار مرتفعة !!!
طبعا والأمثلة كثيرة أكثر من أن تحصى آخرها سهم عقارات ك قالوا رايح نفس منا وصعد السهم كم يوم حد أعلى وتالي صرف 60 مليون سهم على المساكين ونزل .
وقبله سهم امتيازات صعد اسبوع حد أعلى وقالوا هدفه 350 وتالي صرف ب 265 34 مليون سهم وعاد السهم من حيث اتى.
وغيره وغيره وغيره كثييييييييير لكن للأسف نحن نتداول بعواطفنا وليس بعقولنا والطمع بعض الأحيان يعمي بصيرتنا لمن يطيح الفاس بالراس نقول ياريت بعنا وياريت جنينا أرباحنا وياريت وياريت وكلمة ياليت عمرها ما تعمر بيت .
فكروا بعقولكم وخل عنكم المطبلين.
ولا تقولون قاعد أخوفكم لكن أخوكم انقرص من السوق لمن قال بس ، فياليت الواحد يتعلم من غيره.
والبيع والشراء مسئولية شخصية.
