|  من تجاربي الشخصيه بالربح والخساره -
09-05-2008, 11:24 AM
الكل يربح والكل يخسر
واخوكم بوصبري ياما خسر ويما ربح ، والاوسط مره كرمني كوني من اكثر المضاربين الي اعتقد ربحتهم الوف بعمولات البيع والشراء
وعطوني قلم بو ثلاثين دينار 
قلت اتكلم بشي واقعي فيه من تجربتي بالسوق ومن الاخطاء الي تعلمتها
لعل اجد من يستفيد منها ... ويدعيلي بالخير واطلع من وراه باجر وثواب
عادة كنت اربح
---------------------------------
اخسر فقط ليم استمع للاشاعات وياخذني الطمع
ليم ينزل السهم لحدود تحت الدعم واقول
لا اكيد بيرتفع
التجار نزلوه عن عمد علشان يجمعون بالسهم !
------------------------------------------------------
ليم اشتري سهم بسرعه لاني اشوف تداول قوي عليه مع ارتفاعه جم يوم
اقوم واشتريه
لاني اقول السهم بيرتفع ..
وعادة يكون السهم الحين عليه تصريف
-----------------------------------------------------
ليم اكون خسران ..واعاند السوق واقول
مو انا الي اخسر من السوق .. واحاول اعوض بسرعه
هالتعويض السريع ....... دايم يخسرني اكثر
-----------------------------------------------------
اشتري سهم عل شارت انا شايفه ممتاز او على توصية خبير ثقه
وفتره يظل السهم بدون حراك
اقول في نفسي ....... هل اخطات !
ابيع السهم ..وبس ابيعه اشوفه يرتفع .علبالي اني نحس ... والواقع اني غير صبور
----------------------------------------------------
ليم اشتري سهم يرتفع بشكل جيد بس ببطئ
اتابع السوق واشوف سهم ثاني يرتفع بسرعه اقول
ابدل سهمي الربحان ( ربح قليل ) بسهم قاعد يصعد بسرعه
والنتيجه ... السهم الجديد الي شريته يتوقف عن الصعود ويبدي جني ارباح
وسمهي القديم يبدي بالصعود السريع لانه يكون انتهى من فترة التجميع !
---------------------------------------------------
اخسر ليم اشتري على شارت انا متوقع منه الخير
اييك واحد يشكك بنتيجتك ، وتستمع لكلامه وتفقد الثقه بنفسك
وتشوف سهمك يصعد لنفسك توقعك وتقول ليش تسرعت ..
هني انا ا تسرعت .. لا .. انا ماعندي الثقه بنفسي
---------------------------------------------------
اشوف عدة اشخاص ثقه بالمنتدى يتكلمون عن سهم بيرتفع
اقول
قاعدين يطبلون له
ومره وحده اشوف السهم واصل لعنان السما
وبعدين اكتب موضوع ..جزاك الله خير ( بمعنى للاسف ما شريت السهم ) وابي منكم توصيه اخرى !
يقولك فيها .. ما عندي حاليا انطر 6 اشهر على الاقل
---------------------------------------------------------------------
ليم اصدق واحد على سهم واشتريه واربح من وراه ربح طيب
..وبعدين اصدقه دوم وعمياني ... و بدون تفكير او سماع لنقاش الاخرين او ملاحظاتهم
يكون ابهل المره بعد ما خلاني اثق فيه ..بدأ يصرف علي بباقي اسهمه !
----------------------------------------------------------
ليم اشتري سهم ارتفع وبعد فتره يتم اعلان اخبار مناقصه
علبالي بيترفع اكثر
ما ادري انه وقت التصريف ..قد حان
واشوف السهم ينزل علي ..واقول ليش الخبر ما اثر على السهم !
---------------------------------------------
ليم ما افرق بين خبر ربحنا ..وخبر راح نربح !!!
اشتري السهم على الاثنين ....... وعلبالي بالاثنين راح اربح
----------------------------------------
ليم اتابع سمهي كل يوم
واليوم الي ما يرتفع فيه او ينزل اشوي ..اخترع واقول .......
صار جني ارباح ! ازته بسرعه
---------------------------------------
اخسر ليم اكون شاري سهم ووصل الى مرحلة التشبع من الصعود
بس اظل ماسكه وما ابيعه ولا اقطف الثمر
ليم يخيس علي وينزل لاسعار ما اقدر ابيعه فيها
اقول ........ السهم مو تكانه وصعوده وهمي !
وما ادري اني طماع وما اقنع بالربح
---------------------------------------
ليم امسك سهم كسر مناطق الدعم فيه واقول
السهم هذا جيد ما ينترك !
-------------------------------------
ليم اشتري سهم لانه مره ربحني .....
او ما ادش على سهم لاني مره خسرت منه !
علبالي السهم يعرفني ويعرف طوايفي واهلي
وماهو وفرص ربح وخساره فقط
-----------------------------------
اخسر ..ليم اعاند محللين اكفاء وما اشتري سهم ذهبي
لانهم مره وصوني على سهم وما صعد ...
اخسر ليم اتطنز على محلل او واحد خبرة بالسوق
او ما اشكره ولو على الاقل بكلمه مع اني ربحت من وراه !
وليم تصير الصجيه وابي الراي السنع بوقت التصحيح او غيره من الازمات
القاه ما يشارك بالمنتدى
لاني نحشته بوقت الرخاء ...
----------------------------------------
اعتقد كافي ليلحين الي قلته
تحياتي 
ادخل هنا لمعرفة المزيد عن المحفظه [فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]
للهم احفظنا من انفس الجن وأعين الانس
اللهم انا نسألك البعد عن الرياء والعجب ونسئلك يا الله السداد والتوفيق
|